Ошто милиция кызматкерлери Mercedes-Benz Sprinter унаасын айдап качууга жана анын ичиндеги товарды уурдоого шектелген жаранды кармашты.

Ош шаардык ИИБден билдиришкендей, 9унан 10-августка караган түнү саат 05:30дар чамасында Абдыманап Мамыров көчөсүндөгү үйлөрдүн биринин короосунда токтотулуп турган унаа уурдалган.

Тергөөнүн маалыматына караганда, шектүү унаанын эшиги кулпуланбай, ал эми ачкычы салонунда калганынан пайдаланган.

Унаанын жүк ташуучу бөлүгүндө жалпы баасы 94 миң сомду түзгөн печенье болгон. Милициянын маалыматы боюнча, ал киши кайрымдуулук кылып жатканын айтып, печеньелерди өтүп бараткандарга таратып берген. Натыйжада товардын бардыгы таратылып бүткөн.

Андан соң шектүү унааны Ноокат районунун Көк-Жар айылындагы көчөлөрдүн бирине таштап кеткен.

Тергөө иштери уланууда.