«Сапат» билим берүү мекемелер тармагына таандык үч мектеп Агартуу министрлигине өтүп жатат. Бул тууралуу министр Догдуркүл Кендирбаева «Биринчи радиого» билдирди.

Анын айтымында, окуу процесси үзгүлтүккө учурабайт жана мектептер кадимки тартипте ишин улантат. Учурда үч мектептин экөөсү расмий өткөрүлүп берилген, ал эми бир мектеп боюнча юридикалык тактоолор жүрүүдө.

Кендирбаева жаңы окуу жылы аталган мектептерде кадимки режимде башталарына ишендирди.

Эске салсак, өткөн жылы Министрлер кабинетинин төрагасынын мурдагы орун басары Эдил Байсалов «Сапат» билим берүү мекемелер тармагын Түркиянын «Маариф» фондунун башкаруусуна өткөрүү чечими кабыл алынганын билдирген.