Голливуд актрисасы Бай Лин (Bai Ling) Кыргызстанга келерин билдирди. Ал 31-августтан 6-сентябрга чейин өтө турган VI Дүйнөлүк көчмөндөр оюндарынын иш-чараларына катышат.

Актриса бул боюнча видеокайрылуу жасап, анда Кыргызстандын маданияты жана каада-салты менен таанышууну чыдамсыздык менен күтүп жатканын белгилеген.

Бай Лин — кытай тектүү, Голливудда жана эл аралык кинодолбоорлордо жараткан ролдору аркылуу дүйнөлүк деңгээлде таанылган актриса. Ал «Карга» (1994), «Кызыл бурч» (1997), «Анна жана король» (1999), «Такси 3» (2003) жана башка көптөгөн белгилүү Голливуд тасмаларында роль жараткан.

КРдин Маданият министрлиги кино жылдыздын келиши Көчмөндөр оюндарынын алкагындагы маанилүү эл аралык окуялардын бири катары бааланарын билдирди.