Бишкек шаарынын мэри Айбек Жунушалиев Reporter.kg басылмасына калаа бийлиги метро куруу маселесин иштеп чыгууга киришүү ниетинде экенин билдирди.

Анын айтымында, метро куруу идеясы күн тартибинен эч качан түшкөн эмес. Долбоорду ишке ашыруу үчүн техникалык-экономикалык негиздемени (ТЭН) иштеп чыгуу, ошондой эле шаардын геологиялык шарттарын жана курулуштардын жыштыгын изилдөө зарыл.

«Метрону эч ким эч качан жокко чыгарган эмес, күн тартибинен эч ким алып салган жок. Эгер бүгүн бизде ТЭН болсо, инвесторлор болсо, долбоордун так сүрөтү чыкса, биз метро курууга да даярбыз», — деди Жунушалиев.

Мэр ошондой эле Бишкекте метро куруу маселеси совет мезгилинде эле, шаар калкы бир миллионго жакындап калган кезде каралганын эске салды.

Буга чейин айтылган фуникулёрлор (асма жол) долбоору жөнүндө сөз кылып жатып, Жунушалиев анын техникалык-экономикалык негиздемеси иштелип чыкканын жана мындай варианттар дагы эле каралып жатканын, бирок, балким, башында пландалгандай формада болбошу мүмкүндүгүн билдирди.

Эске салсак, 2020-жылы Бишкек шаарынын мэринин милдетин Балбак Түлөбаев аткарып турган кезде мэрия монорельстүү транспорттук системанын долбоорун караган. Ал коомдук транспортту өнүктүрүүнүн жана шаар көчөлөрүндөгү тыгындарды азайтуунун варианттарынын бири катары сунушталган болчу.