2-декабрда Токмок ШИИБге акча каражатын уурдаганы тууралуу арыз менен 1976-жылы туулган Д.М. аттуу жаран кайрылган.
Анын айтымында, 17-ноябрь күнү саат 12:00дөр чамасында «Мүрөк» мал базарынын аймагында белгисиз адамдар анын «Хундай Портер» үлгүсүндөгү унаасынан 320 миң сомун уурдап, изин жашырып кетишкен.
Чүй ОИИБдин басма сөз кызматы билдиргендей, бул факты боюнча Кылмыш-жаза кодексинин «Уурдоо» беренеси боюнча кылмыш иши козголду.
Ыкчам-издөө иш-чараларынын жүрүшүндө милиция кызматкерлери кылмышка шектүүнүн өздүгүн аныкташкан. Шектүү катары мурда бир нече жолу соттолгон, 1972-жылы туулган Н.Ф. кармалып, Кылмыш-процессуалдык кодексинин 96-беренесине ылайык, убактылуу кармоочу жайга киргизилген.
Тергөөнүн жүрүшүндө аныкталгандай, Н.Ф. Токмок шаарынын аймагындагы базарда ушул сыяктуу төрт кылмышка катыштыгы бар экендиги аныкталган. Учурда тергөө иштери уланууда.
Биздин Телеграм каналга катталыңыз
