Президент Садыр Жапаров Кыргыз Республикасынын жарандыгы маселелерин кароо тартибине өзгөртүүлөрдү киргизүү жөнүндө жарлыкка кол койду. Документ он күндөн кийин күчүнө кирет.

Процессти санариптештирүү
Жарандык маселелери боюнча бардык материалдар эми автоматташтырылган маалыматтык система аркылуу — электрондук жана кагаз жүзүндө дагы таризделет. Чет өлкөлүк жарандардын жана жарандыгы жок адамдардын арыздары графикалык планшет аркылуу электрондук кол тамга менен күбөлөндүрүлөт.

Жарандык алуу үчүн жаңы талаптар
Арыз ээсинин жүргөн жери боюнча каттоосу жана төмөнкү документтердин бири болушу керек: жашоого уруксат кагазы (вид на жительство), жарандыгы жок адамдын күбөлүгү, качкындын күбөлүгү же «Мекен-карт». Бул талаптар өлкөгө көчүп келген этникалык кыргыздарга жана тиешелүү документтери бар жарандыгы жок адамдарга жайылтылбайт.

Этникалык кыргыздардын балдары үчүн өзгөчө шарттар
Ата-энесинин экөө тең же жалгыз ата-энеси чет өлкөлүк жарандар — этникалык кыргыздар болгон бала, экинчи ата-энесинин жазуу жүзүндөгү макулдугу менен ата-энесинин биринин арызы боюнча жарандыкка кабыл алынышы мүмкүн. Кыргызстандын аймагында чет өлкөлүк жарандыгы бар этникалык кыргыздардын үй-бүлөсүндө туулган бала — ата-энесинин жарандыгына жана жашаган жерине карабастан автоматтык түрдө КР жараны деп таанылат.

Мурунку жарандыктан чыгуу
Кыргызстандын жарандыгын алган коңшу мамлекеттердин жарандары, бир жылдан кийин КР паспортун кайра алууда мурунку жарандыгынан чыккандыгы тууралуу расмий документти көрсөтүүгө милдеттүү болушат.

Баш тартуу үчүн жаңы негиздер
Эгерде бул өлкөнүн улуттук коопсуздук кызыкчылыктарына каршы келсе, жарандык берүүдөн баш тартылышы мүмкүн.

Жарандыктан ажыроо
Чет өлкөлүк жарандыкты алганда жана КР жарандыгын жоготуу жөнүндө нотариалдык жактан күбөлөндүрүлгөн арызы болгон учурда жарандык жоготулат. Мындан тышкары, туулганы боюнча эмес, кийин жарандыкка кабыл алынган жаран улуттук коопсуздукка коркунуч келтирген ишмердүүлүктү жүргүзсө, же чет мамлекеттин куралдуу күчтөрүндө, укук коргоо органдарында же атайын кызматтарында кызмат өтөсө, жарандыгынан ажырашы мүмкүн.