Быйылкы жылы Чүйдүн Ысык-Ата районунун жол инфраструктурасын өнүктүрүү боюнча иштердин алкагында аймакта жалпы 34,5 чакырым жолго асфальт төшөлөт. Бул тууралуу Транспорт жана коммуникациялар министрлиги билдирди.

Азыркы тапка чейин Жээк – Гагарина унаа жолунун 5 чакырым бөлүгүн асфальттоо толук бүткөрүлдү. Ошондой эле Новопокровка – Туз жана Красная Речка – Ысык-Ата унаа жолдорун асфальттоо иштери аяктады.

Учурда Кант – Горная Серафимовка унаа жолунун 9 чакырымдан ашык тилкесине асфальт төшөөгө даярдык көрүлүүдө. Туз – Интернационал – Жар-Башы жолунун 3 чакырым бөлүгүндө болсо жер жумуштары аткарылып жатат. Ал эми райондогу башка жол тилкелеринде да оңдоо иштери уланууда.