Жалал-Абад облусунун Аксы районунда «Тегене» таш көмүр кени ачылды. Бул тууралуу «Кыргызкөмүр» ААКтан билдиришти.

Компаниянын башкы директору Рустамбек Садыралиевдин катышуусундагы ачылыш аземи 12-сентябрда өттү.

Кен Таш-Көмүр шаарынан түндүктү көздөй болжол менен 30 чакырым аралыкта жайгашкан жана эки тилкени — «Карьердик талаа» жана «Тегене-Шахталык» тилкелерин камтыйт. Кендеги көмүрдүн кору 57,077 миллион тонна деп бааланууда. Лицензиялык аянттын көлөмү 2 миң 260,56 гектарды түзөт.

Көмүр Д үлгүсүнө (узун жалындуу) кирери такталды. Анын жылуулук берүү жөндөмдүүлүгү килограммына 7 миң 336 килокалорияны түзөт.

«Кыргызкөмүрдөн» бул кенди өздөштүрүү көмүр казып алуунун көлөмүн көбөйтүүгө, жаңы жумуш орундарын түзүүгө жана өндүрүштүк инфратүзүмдү өнүктүрүүгө мүмкүндүк берерин белгилешти.