Бишкектин Биринчи Май райондук соту Кемпир-Абад суу сактагычын коргоо комитетинин координатору Мамбетжунус Абыловдун баш коргоо чарасын карады.
Жыйындын жүрүшүндө жактоочу камактагы жаранды үй камагына чыгарууну суранды. Бирок судья Тилек Турдукулов 20-декбарга чейин Бишкектеги СИЗО-1ге камоо чечимин чыгарды.
Мамбетжунус Абылов өзү да тергөөдө анын бийликти басып алууну каалагандыгы боюнча эч кандай далил жок экенин билдирди.
26-октябрда Мамбетжунус Абыловдун үйүндө тинтүү жүргүзүлгөн.
Кыргызстанда жыйырмадан ашык активист жана саясатчы «массалык башаламандыктарды уюштурууга даярдык көрүүгө» шектелип камакка алынган. Кармалгандар буга чейин Кемпир-Абад суу сактагычынын Өзбекстанга берилишине каршы чыгып келишкен.
Эске салсак, 22-октябрда Кемпир-Абад суу сактагычын колдоо комитети түзүлгөн. Анын курамына активисттер, саясатчылар жана депутаттар кирген. 23-октябрда массалык тинтүү иштери башталып, 20дан ашык адам кармалып, алар 48 саатка камалган.
24-октябрда Бишкек шаарында Кемпир-Абад суу сактагычынын астындагы жердин Өзбекстанга берилишине жана активист, саясатчылардын камалышына каршы жөө жүрүш өткөн. 25-октябрда Биринчи май райондук соту тарабынан алар эки айга камакка алынган.
Активист жана саясатчылардын камалышы боюнча ИИМ түшүндүрмө берип, Кылмыш-жаза кодексинин 36-278-беренеси «Массалык баш аламандыктарды уюштурууга даярдануу» менен козголгон кылмыш иши боюнча тергөө амалдары жүргүзүлүп жатканын билдирген.
Биздин Телеграм каналга катталыңыз
