Өлкө башчы Садыр Жапаров калктын жана ишкерлердин салык түйшүгүн азайткан мыйзамга кол койду. Бул тууралуу президенттин басма сөз кызматы билдирди.

Мыйзам үстүбүздөгү жылдын 19-июнунда Жогорку Кеңеш тарабынан кабыл алынган.

Маалыматка ылайык, мыйзам бизнес үчүн дем берүүчү чөйрөнү түзүп, өлкөнүн экономикалык туруктуулугун камсыз кылууга багытталган.

Мыйзамда бир катар салыктык жеңилдиктер каралган:

• транспорт каражаттарына мүлк салыгын жоюу;
• 2025-жылдын 1-январынан тартып 2030-жылдын 31-декабрына чейин айыл чарба жерлерине мүлк салыгынын 0 пайыз өлчөмүндөгү ставкасын белгилөө;
• 2022-жылдын 1-январына чейинки салык мезгили үчүн келип чыккан салык карызын эсептен чыгаруу;
• уюмду жоюуда жана жеке ишкердин ишин токтотууда пландан тышкаркы текшерүүлөрдү кошпогондо, 2022-жылдын 1-январына чейинки салык мезгилине салыктык текшерүүлөрдү жүргүзүүгө тыюу салуу;
• милдеттенмелерди аткаруунун жеңилдетилген режимин белгилөө, чегерилген салык санкциясын төлөөдөн толук же жарым-жартылай бошотуу, ошондой эле калдыктын толук суммасын төлөө мөөнөтүнө жараша туумдарды төлөө.