Жогорку Кеңештин кароосуна электросамокаттарды жана башка жеке мобилдүүлүк каражаттарын ижарага берүү кызматтарына аларды 18 жашка чыга элек адамдарга берүүгө тыюу салууну караган мыйзам долбоору түштү.

Мыйзам долбоору менен «Кыргыз Республикасындагы жол кыймылы жөнүндө» мыйзамга жана Кыргыз Республикасынын Укук бузуулар жөнүндө кодексине өзгөртүүлөрдү киргизүү сунушталууда.

Документке ылайык, электросамокаттарды, гироскутерлерди жана башка жеке мобилдүүлүк каражаттарын ижарага берген компаниялар колдонуучулардын жашын өздүгүн тастыктаган документтер аркылуу текшерүүгө милдеттүү болот. Идентификация кагаз түрүндөгү же электрондук документтер аркылуу жүргүзүлүшү мүмкүн. Ошондой эле жеке маалыматтарды иштетүүгө колдонуучунун макулдугу менен гана жол берилет.

Мындан тышкары, 18 жашка чыга элек адамдарды жеке мобилдүүлүк каражаттарын башкарууга жол берген компаниялар үчүн административдик жоопкерчилик киргизүү сунушталууда.

Мыйзам долбоорунун демилгечилери акыркы жылдары Кыргызстанда мобилдик тиркемелер аркылуу ижарага берилген жеке мобилдүүлүк каражаттарынын саны кыйла көбөйгөнүн белгилешет. Ошол эле учурда жашы жете электердин катышуусундагы жол кырсыктары жана жол кыймылынын эрежелерин бузуу фактылары да көбөйгөн.

Демилгечилердин пикиринде, жаш курагы боюнча чектөөлөрдүн жана колдонуучуларды милдеттүү түрдө идентификациялоонун жоктугу мындай каражаттарды пайдалануу эрежелеринин сакталышын көзөмөлдөөгө жана мыйзам бузгандардын өздүгүн аныктоого толук мүмкүнчүлүк бербей жатат.