Бишкектеги №1 СИЗОдо кармалган ишкер Имамидин Ташов ачкачылык акциясын баштады. Бул тууралуу анын жактоочусу Асел Аргымбаева билдирди.

Анын айтымында, Ташов мекемедеги мыйзам бузуулар тууралуу арыздангандан кийин администрациянын кысымына кабылган.

Аргымбаеванын маалыматына караганда, Ташов мурдагы №235 камерадан (анда 6 адам кармалчу) мыйзамсыз түрдө №218 камерага которулган. Ал жерде 18 абактагы, анын ичинде бир нече адам өлтүрүү боюнча соттолгондор отурат.

Анын туугандары алып келген жана белекке берилген жеке буюмдары конфискацияланган.

Жактоочу Ташовду саясий туткун деп атап, анын укуктары бузулуп жатканын белгиледи.