Алымбек датка менен Курманжан датканын урпагы болгон Абдумалик Бекзат кыргыз жарандыгын алды. Бул тууралуу Жогорку Кеңештин депутаты Таалайбек Сарыбашов өзүнүн соцтармагында жарыялады.

Анын айтымында, Абдумалик – Алымбек датканын тун уулу Абдылдабектин түз урпагы. Анын жарандыкты алышына өлкө башчы Садыр Жапаров колдоо көрсөткөн.

"Кезинде тарыхтын татаал бурулуштарынан улам ата-бабаларыбыздын айрым урпактары чет өлкөлөрдө калып кеткен. Бүгүн алардын өз тамырына, өз элине кайтып келиши тарыхый адилеттүүлүктүн орношу катары бааланууга тийиш"- деп билдирди эл өкүлү.

Абдумалик Бекзат 2024-жылдын кышында Кыргызстанга кайтып келген. Анын бабасы Абдылдабек Алымбек датка уулу Ош вилайетинин беги болгон, ага “датка” наамы берилген. Ал 19-кылымдагы саясий окуялардан улам Алайдан Ооганстандын Бадахшанына көчүп кетүүгө аргасыз болгон.