Бишкекте Кыргызстанда биринчи жолу Asman Airlines авиакомпаниясынын масштабдуу Open Day иш-чарасы — борт коштоочулар жана жердеги кызматтын кызматкерлери кызмат орундарына талапкерлерди ачык тандоо өттү.

Иш-чара жарандык авиация тармагындагы кесиптик келечегин байланыштырууну каалаган жүздөгөн адамдарды биринчи жолу бир аянтчага чогултту. Open Day иш-чарасына кызыгуу жогору болуп, авиакомпанияга жалпысынан 2500гө жакын анкета келип түшкөн. Алдын ала тандоонун жыйынтыгында бетме-бет өтүүчү этапка 250 талапкер чакырылды. Алардын ичинен 80 адам борт коштоочу кызмат ордуна, дагы 20 адам жердеги кызматта иштөө үчүн тандалат.

Масштабдуу ачык тандоо Asman Airlines авиакомпаниясынын өнүгүүсүнүн жаңы этабына даярдыгынын алкагында өткөрүлүүдө. Компания аба кемелеринин паркын Airbus учактары менен кеңейтүүнү жана 2027-жылы эл аралык каттамдарга чыгууну пландап жатат. Жаңы кызматкерлер улуттук авиакомпанияны өнүктүрө турган жана анын келечектеги эл аралык каттамдарында иштей турган команданын бир бөлүгү болушат.