Кыргызстанда балдардын онкологиясына мамлекеттик каржылоо акыркы беш жылда үч эсе көбөйдү. Бул тууралуу саламаттык сактоо министри Дамир Осмонов 21-октябрда Самаркандда өткөн «Балдардын бакубаттуулугуна инвестициялар: келечек муундардын туруктуу жана адилеттүү өнүгүүсүнө карай жол» аттуу дүйнөлүк саммитте жана балдардын онкологиясы боюнча II эл аралык конгрессте билдирди. Бул тууралуу министрликтин басма сөз кызматы маалымдады.

Министрдин айтымында, өлкөдө Балдардын рагынын улуттук реестри түзүлүп, бейтаптарды эсепке алуу жана көзөмөлдөө системасы өркүндөтүлүүдө. Ошондой эле Бишкек жана Ош шаарларында адистештирилген медициналык жардам өнүктүрүлүп жатат.

2023-жылы Кыргызстан Дүйнөлүк саламаттык сактоо уюмунун балдардын рак оорусуна каршы күрөшүү боюнча глобалдык демилгесине кошулган. Анын максаты — 2030-жылга чейин онкологиялык оорулары бар балдардын аман калуу көрсөткүчүн кеминде 60%га жеткирүү.

2021-жылы онкологиялык жардам Мамлекеттик кепилдиктер программасына киргизилген. Ал эми 2025-жылы Кыргызстанда биринчи жолу балага аутологиялык жилик чучугун трансплантациялоо операциясы жасалган.

Осмонов дарылоонун натыйжасы көп жагынан ооруну өз убагында аныктоого байланыштуу экенин белгиледи. Ошондуктан баштапкы медициналык жардам көрсөтүүчү адистердин квалификациясын жогорулатуу, ата-энелерге оорунун алгачкы кооптуу белгилери тууралуу маалымат берүү жана бейтаптарды тиешелүү медициналык мекемелерге жөнөтүү системасын өркүндөтүү маанилүү.

Ошондой эле медициналык жардамга тең жеткиликтүүлүккө, аймактар аралык кызматташтыкка, телемедициналык консультацияларга, балдарга жана алардын үй-бүлөлөрүнө психологиялык жана социалдык колдоо көрсөтүүгө көңүл бурулууда.

2026-жылдын сентябрында Саламаттык сактоо министрлиги Глобалдык платформага кошулуу үчүн арыз берген. Кыргызстан бул демилгеге катышуу балдардын зарыл дары-дармектерге жеткиликтүүлүгүн кеңейтүүгө жана улуттук онкологиялык жардам системасын бекемдөөгө көмөктөшөт деп үмүттөнүүдө.

«Дарыланууга муктаж ар бир бала жашаган жерине жана үй-бүлөсүнүн каржылык мүмкүнчүлүгүнө карабастан, керектүү дары-дармектерди өз убагында алуу мүмкүнчүлүгүнө ээ болушу биз үчүн өзгөчө маанилүү», — деп баса белгиледи министр.

Ал мамлекеттерди жана эл аралык өнөктөштөрдү илимий изилдөөлөр, адистерди даярдоо, клиникалык тажрыйба алмашуу жана дарылоонун заманбап ыкмаларын киргизүү жаатында күч-аракеттерди бириктирүүгө чакырды.