17-октябрда Ереван шаарында Кыргызстандын президенти Садыр Жапаров менен Армениянын премьер-министри Никол Пашинян кыргыз-армян кызматташтыгын өнүктүрүүгө багытталган 10 эки тараптуу документке кол коюшту. Бул тууралуу президенттин басма сөз кызматы билдирди.

Кол коюлган документтер эки өлкө ортосунда ар кандай тармактарда кызматташууга багытталган:

1. Кыргызстандын президенти Садыр Жапаров менен Армениянын премьер-министри Никол Пашиняндын биргелешкен билдирүүсү;
2. КРдин Министрлер кабинети менен Армения Өкмөтүнүн ортосундагы жарандардын сапарлары жана жүрүү тартиби жөнүндө макулдашуу;
3. Кыргыз Республикасы менен Армения Республикасынын ортосундагы 2027–2029-жылдарга кызматташуу жөнүндө жол картасы;
4. КРдин Агартуу министрлиги менен Армениянын Билим берүү, илим, маданият жана спорт министрлигинин ортосундагы билим берүү жаатында кызматташуу жөнүндө макулдашуу;
5. КРдин Илим, жогорку билим берүү жана инновациялар министрлиги менен Армениянын Билим берүү, илим, маданият жана спорт министрлигинин ортосундагы билим берүү жана илим жаатында кызматташуу жөнүндө меморандум;
6. КРдин Жаратылыш ресурстары, экология жана техникалык көзөмөл министрлиги менен Армениянын Айлана-чөйрөнү коргоо министрлигинин ортосундагы Ысык-Көл жана Севан көлдөрүн сактоо боюнча кызматташтык жөнүндө өз ара түшүнүшүү меморандуму;
7. КРдин Социалдык фонду менен Армениянын Эмгек жана бакубаттуулук министрлигинин ортосундагы пенсия менен камсыз кылуу жаатындагы кызматташуу жөнүндө макулдашуу;
8. КРдин Жеке маалыматтарды коргоо боюнча мамлекеттик агенттиги менен Армениянын Юстиция министрлигинин ортосундагы кызматташуу жөнүндө меморандум;
9. КРдин Улуттук илимдер академиясы менен Армениянын Улуттук илимдер академиясынын ортосундагы кызматташтык жөнүндө меморандум;
10. Бишкек шаары менен Ереван шаарынын ортосунда боордоштук мамилелерди түзүү жөнүндө макулдашуу.

Эске салсак, 15-17-октябрь күндөрү Садыр Жапаров Арменияга алгачкы расмий сапарын жасады. Анын алкагында өлкө башчы БУУнун Биологиялык ар түрдүүлүк жөнүндө конвенциясынын тараптарынын 17-конференциясынын (COP17) алкагында өткөн Лидерлер саммитине катышты. Ошондой эле Армениянын президенти Ваагн Хачатурян жана премьер-министри Никол Пашинян менен жолугушуп, сүйлөшүүлөрдү өткөрдү.