Борбор калаанын Панфилов сейил багындагы аттракциондон кулаган кыздын окуясы боюнча шектүү катары кармалган 24 жаштагы аттракциондун оператору соттун чечими менен үй камагына чыгарылды. Бул тууралуу шаардын Биринчи Май райондук милициясы кабарлады.

Маалыматка ылайык, шектүү 1-июнга чейин үй камагында болот.

Белгилей кетсек, 31-март күнү Панфилов сейил багындагы иштеп жаткан аттракциондордун биринен 2006-жылы туулган кыз кулап, оор жаракат алып, ооруканага жеткирилген.

Дарыгерлер учурда бейтаптын абалы оор экенин, ал акырындан өзүнө келе баштаганын жана анын баш, бет сөөктөрү сынып, ачык жаракаттары бар экенин айтышты.