Жогорку Кеңештин жыйынында депутат Медер Чотонов бир нече жыл мурун мамлекет тарабынан берилген «Баатыр эне» ордендеринин сапатына баатыр энелер нааразы болуп жатканын билдирди.

Анын айтымында, 17-майда Ысык-Көл облусунун Тоң районунда Энелер күнүнө арналган баатыр энелер форумунда аялдар 5–6 жыл мурда берилген ордендер карарып, дат басып, арткы бекиткичтери сынып калганын айтышкан.

«Кыскасы, сапаты начар болуп калыптыр. “Баатыр эне” ордени — бул мамлекет тарабынан берилген жогорку сыйлык. Ошондуктан тиешелүү органдар сапаты начарлап кеткен ордендерди жаңылап берүү маселесин карап чыгышы керек», — деди депутат.