Сеул шаарында КР Экономика министри Бакыт Сыдыковдун төрагалыгы алдында Экономикалык кызматташтык боюнча кыргыз-корей өкмөттөр аралык комиссиясынын 7-жыйыны аяктады. Тараптар эки тараптуу өз ара аракеттенүүнү сапаттуу кеңейтүүгө багытталган бир катар стратегиялык макулдашууларга жетишишти.

Негизги чечим болуп кореялык гранттардын жана техникалык жардамдын колдоосу менен Кыргызстанда жаңы инфратүзүмдүк жана социалдык долбоорлорду ишке ашыруу саналды. Ошондой эле «жашыл» экономиканы, өнөр жайды жана энергетиканы өнүктүрүү боюнча пландар бекитилди. Ишкердик байланыштарды чыңдоо максатында тараптар туруктуу негизде бизнес-форумдарды жана түз бизнес-миссияларды өткөрүүнү макулдашышты.

Макулдашуулардын өзүнчө блогу эмгек миграциясы, саламаттык сактоо, билим берүү жана инновациялар тармагындагы өнөктөштүктү кеңейтүүгө тиешелүү болду. Бул демилгелерди ишке ашыруу республиканын агросекторуна жана туризмине кореялык алдыңкы технологияларды киргизүүгө, ошондой эле соода-экономикалык мамилелердин туруктуу өсүшүн камсыз кылууга мүмкүндүк берет.