Баткен районунун Согмент айылында Чек ара кызматынын «Согмент» чек ара посту ачылды. Бул тууралуу президенттин Баткен облусундагы өкүлчүлүгүнүн басма сөз кызматы билдирди.

Маалыматка ылайык, постто кызмат өтөө үчүн шарттар каралып, казарма курулган. «Согмент» постунун кызматкерлери кыргыз-өзбек мамлекеттик чек арасынын 12 чакырымдан ашык бөлүгүн кайтарат.

Бул объект мамлекеттин коопсуздугун чыңдоо жана чек ара аймактарында туруктуулукту камсыз кылуу максатында ишке киргизилген.

Ачылыш аземге Чек ара кызматынын төрагасы Абдикарим Алимбаев онлайн форматта катышкан. Ал эми жеринде президенттин Баткен облусундагы өкүлү Мамыржан Рахимов, жергиликтүү жетекчилер жана чек арачылар катышкан.