Жалал-Абаддын Базар-Коргон районунда базар баасы 187 млн 876 миң сомду түзгөн жер тилкеси толугу менен муниципалдык менчикке кайтарылды. Бул тууралуу Башкы прокуратура билдирди.

Райондук прокуратура тарабынан жүргүзүлгөн текшерүүдө Бишкек-Ош унаа жолунун Базар-Коргон шаары аркылуу өткөн тилкесиндеги 4 гектар жер 2013-жылы мыйзамсыз түрдө жеке менчикке берилгени аныкталган.

Маалыматка ылайык, калктуу конуштарга таандык бул жер тилкесин Базар-Коргон айыл өкмөтүнүн кызмат адамдары өткөрүп беришкени белгилүү болгон. Прокурордук чаралардын натыйжасында жер мамлекетке кайтарылган.