Кыргызстандын Президенти Садыр Жапаров 1-сентябрда ШКУнун саммитинде бир катар маанилүү документтердин, анын ичинде ШКУнун Хартиясына өзгөртүүлөрдү жана толуктоолорду киргизүү жөнүндө протоколдун жана Универсалдуу борбор жөнүндө жобонун кабыл алынгандыгын, ошондой эле Бишкектин эл аралык уюшкан кылмыштуулукка каршы аракеттенүү борборунун ишин баштоого даяр экенин билдирди.

Мамлекет башчысы Кыргызстандын борборунда Борборду түзүү боюнча жүргүзүлгөн иштер тууралуу маалымат берди.

«Кыргыз Республикасы Бишкекте эл аралык уюшкан кылмыштуулукка каршы аракеттенүү борборунун ишин баштоо үчүн бардык зарыл шарттарды түздү», — деди Жапаров.

Президент ошондой эле Борбор тууралуу атайын видеоролик көрсөттү.

Анда Кыргызстан Шанхай кызматташтык уюмунун негиздөөчү мамлекеттеринин бири экени жана ШКУнун ишмердүүлүгүнүн алгачкы күндөрүнөн тартып аймактык коопсуздукту чыңдоону жана укук коргоо органдарынын практикалык өз ара аракеттенүүсүн өнүктүрүүнү ырааттуу колдоп келе жатканы белгиленген.

Кыргызстандын негизги демилгеси — Бишкекте трансулуттук уюшкан кылмыштуулукка каршы аракеттенүү борборун түзүү сунушу болду.

«Бул сунуш мүчө мамлекеттердин колдоосуна ээ болуп, Коопсуздукка болгон чакырыктарга жана коркунучтарга каршы аракеттенүү боюнча универсалдуу борбор жөнүндө макулдашууда бекитилген», — деп айтылат видеороликте.

Кыргызстан Борбор үчүн зарыл болгон инфраструктураны даярдап койду. Бишкектеги имарат жаңы бөлүктү жайгаштырууга жана анын ишин баштоого даяр.

«Бишкекте Борбордун түзүлүшү — Кыргыз Республикасынын бүтүндөй ШКУ мейкиндигинин коопсуздугун, туруктуулугун жана туруктуу өнүгүүсүн камсыздоого кошкон практикалык салымы», — деп белгиленет видеодо.

Жыйындын соңунда Садыр Жапаров ШКУга мүчө мамлекеттердин башчыларынын Кеңешинин жыйынын жабык деп жарыялап, катышуучуларды «ШКУ+» форматында катышып жаткан мамлекет башчылары менен бирге жамааттык сүрөткө түшүүгө чакырды.

«Кымбаттуу достор, ушуну менен Шанхай кызматташтык уюмуна мүчө мамлекеттердин башчыларынын Кеңешинин жыйынын жабык деп жарыялайм. Жыйындын бардык катышуучуларын ШКУ+ форматында катышып жаткан мамлекет башчылары менен бирге жамааттык сүрөткө түшүүгө чакырам. Саммит ШКУ+ форматындагы расмий кабыл алуудан кийин ишин улантат. Катышканыңыздар үчүн баарыңыздарга рахмат», — деди Жапаров.