Улуттук коопсуздук боюнча мамлекеттик комитети (УКМК) синтетикалык баңгизаттар даярдалып жүргөн лабораторияны аныктап, бир нече кишини кармады.

Атайын кызматтын маалыматында, баңгизаттарды даярдоо жана аларды Бишкек шаарынын жана Чүй облусунун аймагында сатуу менен алектенүүгө шектелип Н.А.Д., А.Ч.Х. жана Д.А.В. аттуу жарандар кармалды. Бул боюнча Кылмыш-жаза кодексинин «Баңгизат каражаттарын, психотроптук заттарды жана алардын аналогдорун сатуу максатында мыйзамсыз даярдоо» беренеси боюнча иш козголду.

Учурда бул лабораториянын ишине тиешеси бар башка адамдарды жана баңгизат сатуу каналдарын аныктоо боюнча ыкчам-издөө иштери улантылып жатканы айтылды.