Бишкек шаарында коомдук тамактануу жайларынын биринде массалык уулануу болду. Саламаттык сактоо министрлиги Республикалык жугуштуу оорулар ооруканасына жалпы 17 жабырлануучу кайрылганын билдирди.

Учурда 13 жаран ооруканага жаткырылды, алардын ичинен төртөө жаш балдар. Оорукананын башкы дарыгери Гулжигит Аалиевдин айтымында, бардык бейтаптардын абалы туруктуу деп бааланууда, аларга тиешелүү дарылоо жүргүзүлүүдө.

Жергиликтүү ЖМКлар алдына уулануу Бишкектеги «Даамдуу» тез тамактануучу жайында болгонун жазышууда.

Учурда Мамлекеттик санитардык-эпидемиологиялык көзөмөл борбору эпидемиологиялык иликтөө иштерин жүргүзүүдө.