Бишкекте 21-июлда Өзбекстандын президенти Шавкат Мирзиёев тууралуу «Жаңы Өзбекстан: Шавкат Мирзиёевдин жолу» аттуу китептин кыргыз тилиндеги басылышынын бет ачары өтөт. Бул тууралуу иш-чаранын уюштуруучулары билдиришти.

Бет ачар аземи Алыкул Осмонов атындагы Кыргыз Республикасынын Улуттук китепканасында өтөт. Ага мамлекеттик жана коомдук ишмерлер, дипломатиялык өкүлчүлүктөрдүн, илимий чөйрөнүн, маданият тармагынын өкүлдөрү жана жалпыга маалымдоо каражаттарынын өкүлдөрү катышат.

Китеп Шавкат Мирзиёев бийликке келгенден кийин Өзбекстанда жүргүзүлгөн саясий жана экономикалык реформаларды, өлкөнүн өнүгүү стратегиясын жана эл аралык саясаттагы өзгөрүүлөрдү талдаган эл аралык илимий-аналитикалык эмгек болуп саналат.

Буга чейин басылманын англис, араб, орус жана башка тилдердеги нускалары АКШда, анын ичинде Вашингтондогу Конгресстин китепканасында, ошондой эле Женевада, Исламабадда жана Түркияда тааныштырылган.

Уюштуруучулардын айтымында, китептин кыргыз тилинде жарык көрүшү Кыргызстан менен Өзбекстандын ортосундагы маданий жана интеллектуалдык кызматташтыкты мындан ары да чыңдоого өбөлгө түзөт.