Бишкек шаарынын Токтогул көчөсүнүн четинде веложол үчүн атайын бөлгүчтөр коюлуп жатат. Мэриянын маалыматында, сыноо жүргүзүү үчүн биринчи тилке катары Токтогул көчөсүнүн Манас проспектисинен Жаш Гвардия бульварына чейинки бөлүгү тандалып алынган.

Бул жерде бөлгүчтөрдүн жол коопсуздугуна тийгизген таасири бааланат. Текшерүүнүн жыйынтыгынан кийин жана жарандардын пикирине жараша долбоорду кеңейтүү маселеси чечилет.

Экинчи этапта Токтогул көчөсүнүн Манас проспектисинен Абдрахманов көчөсүнө чейинки бөлүгүнө бөлгүчтөрдү орнотуу пландалууда. Сыноо учурунда бөлгүчтөрдүн формасы же конструкциясы өзгөртүлүшү мүмкүн.

Мэрия бул долбоор велосипедчилердин коопсуздугун камсыздоо жана шаардык чөйрөнү жакшыртууга багытталганын билдирди.