Кыргызстанда антимонополиялык мыйзамдардын бузулушу тууралуу арыздарды берүү жана кароо тартибин өзгөртүү сунушталууда. «Атаандаштык жөнүндө» мыйзамга тиешелүү өзгөртүүлөрдү Жогорку Кеңештин депутаты Улан Примов иштеп чыкты. Мыйзам долбоору коомдук талкууга коюлду.

Негиздеме-маалымкатта айтылгандай, учурда эгер арызга документтердин толук эмес топтому тиркелсе, антимонополиялык орган аны карабастан кайтарып берүүгө укуктуу. Ошол эле учурда мыйзам аталган мекемени арыз ээсине кемчиликтер жөнүндө алдын ала кабарлоого жана аларды жоюуга убакыт берүүгө милдеттендирбейт.

Натыйжада жарандарга жана компанияларга антимонополиялык органга кайрадан кайрылууга, документтерди кайра чогултууга жана кошумча убакыт коротууга туура келет.

Мыйзам долбоорунун демилгечилери анча чоң эмес каталар же айрым документтердин жоктугу антимонополиялык мыйзамдардын мүмкүн болуучу бузулушу тууралуу билдирүүлөрдү кароого тоскоолдук жаратышы мүмкүн экенин белгилешет.

Бул көйгөйдү чечүү үчүн «Атаандаштык жөнүндө» мыйзамдын 27-беренесинин 2-бөлүгүн өзгөртүү сунушталууда.

Мыйзам долбооруна ылайык, эгерде арызда жетишпеген документтер же аны кароого тоскоол болгон башка кемчиликтер аныкталса, антимонополиялык орган төмөнкүлөргө милдеттүү болот:

• аныкталган кемчиликтер жөнүндө арыз ээсине кабарлоого;
• аларды жоюу үчүн мөөнөт белгилөөгө;
• документтердин топтомун толуктоого же каталарды оңдоого мүмкүнчүлүк берүүгө.

Мекеме арызды кароосуз кайтарууга арыз ээси кемчиликтерди белгиленген мөөнөттө жойбогон учурда гана укуктуу болот.

Ошол эле учурда антимонополиялык мыйзамдардын бузулуу фактыларын тастыктаган документтерди тапшыруу талабы сакталат. Арыздарды, мурдагыдай эле, жазуу жүзүндө же электрондук түрдө берүүгө болот.

Демилгечилердин пикиринде, бул өзгөртүүлөр кайра кайрылуулардын санын кыскартууга, жарандардын жана бизнестин антимонополиялык орган менен өз ара аракеттенүүсүн жөнөкөйлөтүүгө жана арыздардын өз убагында каралышын камсыз кылууга шарт түзөт.

Анара Мамытова