Бишкек шаарында үй-тиричилик товарларын жана тиричилик техникаларын чыгарган Kampa Industrial Park өндүрүштүк аянтчасы ишке киргизилди. Бул тууралуу Кыргызстандын Инвестициялар боюнча улуттук агенттик билдирди.

Ачылыш аземге Кыргызстандын Инвестициялар боюнча улуттук агенттиктин жана бизнес-коомчулуктун өкүлдөрү катышты.

Аталган аянтчада LAMIS, CAISER жана BLESK бренддеринин үй-тиричилик буюмдары чыгарылат. Ошондой эле Midea, Haier жана Baumann продукцияларын өндүрүү жана сатуу пландалууда. Ишкананын ишке кириши 200гө жакын жумуш ордун түзүүнү карайт.

Агенттиктин маалыматында, өндүрүлгөн товарлардын бир бөлүгү «Кыргызстанда өндүрүлгөн» (Made in Kyrgyzstan) маркировкасы менен экспортко чыгарылат.