10-ноябрда Минск шаарында Кыргызстандын жана Беларустун аймактарынын биринчи форуму өттү. Анын жыйынтыгында эки өлкөнүн аймактарынын ортосундагы кызматташтык боюнча алты документке кол коюлду. Бул тууралуу Айыл чарба министрлигинин басма сөз кызматы билдирди.

Форумдун ачылышында Министрлер кабинетинин төрагасынын орун басары, Суу ресурстары, айыл чарба жана кайра иштетүү өнөр жайы министри Эрлист Акунбеков жана Беларустун премьер-министринин орун басары Александр Терехов сөз сүйлөштү. Акунбеков Беларуска иш сапары менен барган. Форумду өткөрүү боюнча макулдашууга эки өлкөнүн өкмөт башчыларынын расмий сапарлары учурунда жетишилген.

Акунбеков аймактар аралык кызматташтыкты эки тараптуу мамилелердин маанилүү багыттарынын бири деп атады. Анын айтымында, 2030-жылга чейин соода-экономикалык кызматташтыкты өнүктүрүү боюнча Жол картасындагы артыкчылыктуу багыттарды конкреттүү биргелешкен долбоорлор менен толуктоо зарыл.

Ал Кыргызстанда аймактардын экономикалык адистешүүсүн эске алуу менен аларды комплекстүү өнүктүрүүгө багытталган мамлекеттик программалар ишке ашырылып жатканын белгилеп, беларус ишканаларын биргелешкен долбоорлорго активдүү катышууга чакырды.

Эки өлкөнүн аймактарынын жетекчилерине кайрылып, Министрлер кабинетинин төрагасынын орун басары мындай деди:

«Колдо болгон мүмкүнчүлүктөрдү ишке ашыруу көп жагынан сиздердин демилгеңиздерге байланыштуу. Форумдун алкагында түзүлгөн байланыштарды сактап, жооптуу өкүлдөрдү дайындап, мөөнөттөрү жана күтүлгөн натыйжалары так көрсөтүлгөн кызматташтык пландарын иштеп чыгуу зарыл».

Ал Кыргызстандын аймактык бийлик органдарына беларус кесиптештери менен биргеликте кызматташууга кызыкдар ишканаларды аныктоону, биргелешкен ишканаларды түзүү үчүн аянтчаларды карап чыгууну жана конкреттүү сунуштарды даярдоону тапшырды.

Кыргызстандын аймактары менен шаарларынан барган делегациялар үчүн өзүнчө программа уюштурулуп, анын алкагында алар өнөктөштөрдүн мүмкүнчүлүктөрү менен таанышып, кызматташуунун багыттарын талкуулашты.

Форумдун жыйынтыгында төмөнкү документтерге кол коюлду:

• соода-экономикалык, илимий-техникалык жана социалдык тармактардагы кызматташтык жөнүндө макулдашуу;
• өз ара түшүнүшүү жөнүндө меморандум;
• макулдашууну ишке ашыруу боюнча 2027–2028-жылдарга карата иш-чаралар планы;
• соода-экономикалык, илимий-техникалык, маданий жана гуманитардык тармактардагы кызматташтыкты өнүктүрүү боюнча 2027–2029-жылдарга карата Жол картасы;
• шаарлар ортосунда боордоштук мамилелерди түзүү жөнүндө меморандум;
• экономика, соода, маданият, билим берүү жана туризм тармактарындагы кызматташтыкты өнүктүрүү боюнча 2027–2029-жылдарга карата Жол картасы.