Бишкектин Асаналиев көчөсүндөгү (мурдагы Некрасов) темир жол өтмөгү унаалар үчүн жарым-жартылай жабылып турат. Чектөө 8, 9, 10 жана 11-октябрь күндөрү саат 21:00дөн 06:00гө чейин күчүндө болот. Бул тууралуу «Кыргыз темир жолу» ишканасы билдирди.

Бул чара Бишкек-1 – Бишкек-2 өткөөлүнүн 3778-чакырымында темир жол өтмөгүндөгү тосуучу түзүлүштү алмаштыруу иштерине байланыштуу киргизилүүдө.

Маалыматка ылайык, оңдоо иштери этап-этабы менен жүргүзүлөт: алгач жолдун бир тарабы жабылып, ал тилке бүткөндөн кийин кыймыл жолдун экинчи тарабы аркылуу уюштурулат.

Ишкана бул иштер Бишкек шаарынын Милициянын кайгуул кызматы башкармалыгы менен макулдашылганын билдирди. Ошондой эле айдоочуларга каттамдарын алдын ала пландап алууну эскертти.