Милиция кызматкерлери тарабынан бир нече үйдө уурулук жасоого шектелип үч жигит кармалды. Бул тууралуу Чүй облустук ИИББнин басма сөз кызматы билдирди.

Чүй облусунун Кожомкул айылында жергиликтүү тургундардын үйлөрүнөн акча, зер буюмдар жана башка баалуу мүлктөр уурдалган бир нече учур катталган. Бардык фактылар боюнча Кылмыш-жаза кодексинин «Уурулук» беренеси менен кылмыш иштери козголгон. Мындан тышкары, шектүүлөр уурулук учурунда байкоо камераларына түшүп калган.

Укук коргоо кызматкерлери шектүүлөрдүн өздүгүн такташкан. Алар 25 жаштагы К.Б., 21 жаштагы А.К. жана 20 жаштагы М.А. экени аныкталып, камакка алынышкан. Тергөөнүн жүрүшүндө алардын алты уурулук фактысына катыштыгы бар экени белгилүү болду. Учурда тергөө иштери уланууда.