Чыңгыз Ахматов Кыргызстандын башкы прокурорунун биринчи орун басары болуп дайындалды. Тиешелүү документке президент Садыр Жапаров кол койду.

Башкы прокуратуранын басма сөз кызматы билдиргендей, Чыңгыз Аширбекович Ахматов 1981-жылдын 7-июлунда Фрунзе шаарында (азыркы Бишкек) туулган.

2003-жылы Кыргыз улуттук университетинин юридикалык факультетин аяктаган.

Прокуратура органдарындагы эмгек жолун 2004-жылы Талас облустук прокуратурасынын стажер-прокурору болуп баштап, кийинчерээк бөлүмдүн прокурору болуп иштеген.

2005–2006-жылдары Ош облустук прокуратурасынын бөлүмүнүн улук прокурору, 2006–2007-жылдары Кара-Суу районунун прокурорунун жардамчысы болгон. 2007-жылы Жалал-Абад облустук прокуратурасынын бөлүмүнүн улук прокурору болуп иштеген.

2007–2009-жылдары Башкы прокуратуранын прокурорунун жардамчысы жана улук жардамчысы кызматтарын ээлеген.

2017–2019-жылдары Башкы прокуратуранын башкармалыгынын прокурору болуп иштеген. 2018–2019-жылдары Токмок шаарынын прокурорунун милдетин аткарган.

2019-жылдан 2022-жылга чейин Ахматов Чүй облусунун Ысык-Ата районунун прокуратурасын, ал эми 2022-жылдан 2024-жылга чейин Баткен облусунун Кызыл-Кыя шаардык прокуратурасын жетектеген.

2024-жылдын 12-июнунда ал Ош облусунун прокурору болуп дайындалган болчу.