Монголиядагы Чыңгызхан музейинде Кыргыз каганаты тууралуу маалымат камтылган бөлүм ачылат. Бул тууралуу элчи Айбек Артыкбаев Жогорку Кеңештин тармактык комитетинин жыйынында билдирди.

Анын айтымында, аталган бөлүм келерки жылы ачылат.

“Маданият министрлиги жана Тарых музейи менен бирге Улан-Батор шаарындагы Чыңгызхан атындагы Улуттук тарых музейинде Улуу Кыргыз каганаты тууралуу бөлүм ачканга макулдашууга жетиштик. Кудай буйруса, келерки жылы ачылат”, – деди ал.

Депутат Кубанычбек Самаков бул ишти Маданият министрлигине тапшырса, иш жүрбөй калышы мүмкүн экенин айтып, бул маселени өзү көзөмөлгө алуусун сунуштады.

Элчи ишти көзөмөлгө аларын билдирди.