Борбор калаадагы «Жаштык» аренасында киберкоопсуздук боюнча «CYBERNOMAD FEST 2026» улуттук фестивалы өтүүдө. Бул иш-чара мамлекеттик органдардын, финансы секторунун, IT-индустриясынын, эл аралык уюмдардын өкүлдөрүн, ошондой эле алдыңкы эксперттер менен студенттерди — жалпысынан 700дөн ашык катышуучуну бириктирип, жылдын эң ири профилдик аянтчасына айланды.

Форумдун башкы уюштуруучусу — Кыргыз Республикасынын Улуттук коопсуздук мамлекеттик комитети (УКМК). Ал эми өнөктөштөрү катары КР Улуттук банкы, «Beeline» компаниясы (SkySOC) жана ЕККУнун Бишкектеги Программалык кеңсеси катышты.

Иш-чаранын салтанаттуу ачылышы расмий өкүлдөрдүн куттуктоо сөздөрү менен башталды. Катышуучуларга Министрлер кабинетинин төрагасынын биринчи орун басары Данияр Амангелдиев, «Beeline» компаниясынын башкы директору Кубанычбек Шатемиров жана ЕККУнун Бишкектеги Программалык кеңсесинин башчысынын милдетин аткаруучу Джон ДиПирро кайрылуу жасашты. Спикерлер өлкөнүн маанилүү санариптик инфратүзүмүн коргоо үчүн мамлекет менен жеке сектордун күч-аракетин бириктирүүнүн стратегиялык маанисин баса белгилешти.

Маалыматтык жана киберкоопсуздукту камсыздоо маселелери боюнча мекемелер аралык комиссиянын биринчи жыйынынын өткөрүлүшү фестивалдын негизги окуяларынын бири болду. Анда координациялоо, актуалдуу коркунучтарга баа берүү жана мамлекеттик маалыматтар базасын коргоо маселелери талкууланды.

Фестивалдын программасы төрт негизги багытка бөлүнгөн:

• Cyber Conference — киберкоркунучтарга, банктык системаларды жана телекоммуникацияны коргоого арналган эксперттик панель;
• Cyber EXPO — маалыматтык коопсуздук чөйрөсүндөгү 10дон ашык алдыңкы компания өзүнүн инновациялык чечимдерин тартуулаган технологиялык көргөзмө;
• Networking Hub — бизнес, илимий коомчулук жана мамлекеттин ортосунда ишкердик байланыштарды түзүү аянтчасы;
• Cyber Nomad CTF — улуттук кибермашыгуулар.

Ошентсе да, фестивалдын өзөктүү жана эң кызыктуу окуясы киберкоопсуздук боюнча практикалык мелдеш болду. Турнирдин финалына киберокуяларды иликтөө боюнча алдын ала тандоо турларынан ийгиликтүү өткөн өлкөнүн 11 күчтүү командасы чыкты.

Финалдык таймаш реалдуу хакердик чабуулдарды туураган Attack/Defense форматында өтүүдө. Командалар реалдуу убакыт режиминде өтө татаал тапшырмаларды аткаруусу зарыл. Аларга өз серверлерине жасалган чабуулдардын мизин кайтаруу, ошол эле учурда атаандаштарынын системаларындагы аялуу жерлерди табуу жана системага мыйзамсыз кирүүнүн кесепеттерин ыкчам жоюу кирет.

Уюштуруучулар «CYBERNOMAD FEST 2026» жыл сайын өтүүчү улуттук платформа катары пландалганын белгилешти. Анын башкы максаты — тармактын мыкты адистерин аныктоо гана эмес, Кыргызстандын кибертуруктуулугун чыңдоо үчүн узак мөөнөттүү экосистеманы калыптандыруу.