Жыл башынан бери КР Улуттук коопсуздук мамлекеттик комитетинин Чек ара кызматы жалпы суммасы 70,2 миллион сомдон ашык болгон контрабанданын 71 фактысына бөгөт койду (анын басымдуу бөлүгү — 41 учур өткөрмө пункттарынан тышкары жерлерде аныкталган). Мындан тышкары, ЕАЭБге мүчө өлкөлөрдүн ички чек аралары аркылуу мыйзамсыз алып өтүүгө аракет кылынган 49,2 миллион сомдук 134 партия эсепке алынбаган жүк кармалган.

Айыл чарба малдарын чек арадан мыйзамсыз алып чыгууга өзгөчө көңүл бурулду: 7 айдын ичинде бодо мал жана жылкыларды жашыруун айдап өтүүнүн 63 аракети катталган. Өткөрмө бекеттерин айланып өтүү максатында мыйзам бузуучулар атайын диверсиялык аракеттерге чейин барышкан — мамлекеттик чек аранын тосулган тилкелериндеги тикенектүү зым тартылган тосмолорду талкалап жана кесип кетишкен.

Ведомстводон ошондой эле көмүскө каналдардын уюштуруучулары тарабынан маалыматтык чабуулдарга жана кызматтын кадыр-баркын түшүрүү аракеттерине туш болуп жатышканын белгилешти. Бирок Чек ара кызматы мындай маалыматтык басым көзөмөлдү күчөтүүгө жана мыйзамсыз трафикке каршы чечкиндүү күрөш жүргүзүүгө эч кандай тоскоол боло албастыгын билдирди.