Кыргызстан Кытай, Россия жана Индияны кошкондо Шанхай кызматташтык уюмуна (ШКУ) мүчө мамлекеттердин жаңы эл аралык каржы институттарын жайгаштыруу, ошондой эле башкаруучулук чечимдерди иштеп чыгуу борборлору үчүн бейтарап аянтча болуу дараметине ээ. Бул тууралуу КРСУ жана УСИИнин алдындагы Стратегиялык талдоо жана болжолдоо институтунун эксперти Марат Абдылдаев «Ой Ордо» эксперттик демилгелер борбору тарабынан Бишкекте уюштурулган тегерек столдо билдирди.

Аналитиктин баамында, дүйнөлүк экономиканын глобалдык кайра түзүлүү мезгилинде уюмдун юбилейлик саммитинин кыргыз жеринде өтүшү республика үчүн стратегиялык мүмкүнчүлүктөрдү ачат. Батыштын үстөмдүк кылган каржы моделинин кризиси жана анын ашыкча спекулятивдик басымы шартында, батыштык эмес дүйнөнүн мамлекеттери жана ШКУнун лидерлери экономикалык туруктуулукту жана коопсуздукту камсыз кылуунун альтернативдүү механизмдерин жигердүү калыптандырууда.

Абдылдаев чакан өлкөлөрдүн кызыкчылыктарынын эске алынышы эл аралык институттардын ийгиликтүүлүгүнүн жана туруктуулугунун негизги көрсөткүчү экенин баса белгиледи. ШКУнун ичиндеги катышуучулардын тең укуктуулук принциптерине берилгендик Бишкекке улуттук кызыкчылыктарын коргоого гана эмес, мамлекеттик башкаруу, аймактык логистика жана каржы чөйрөсүндө интеграциялык демилгелерди сунуштоого да мүмкүндүк берет.