Калкты каттоо биринчи жолу мобилдик тиркемени колдонуу менен электрондук форматта каттоочулардын жеке уюлдук телефону же планшет аркылуу өткөрүлөт. Бул туурасында Улуттук статистикалык комитетинин төрагасы Бактыбек Кудайбергенов президент Садыр Жапаров менен кездешкенде билдирди.
Анын айтымында, 2022-жылдын 25-мартынан 3-апрелине чейин жана республиканын айрым аймактарында 2022-жылдын 23-апрелинен 2-майына чейин өткөрүлө турган калкты жана турак жай фондун каттоого толук даяр. Азыркы учурда 28 миңге жакын убактылуу каттоо кызматкерлери (координаторлор, инструктор-көзөмөлдөөчүлөр жана каттоочулар) кабыл алынып, аларды окутуу семинарлары өткөрүлдү. Иш-чараны уюштурууга байланышкан бардык каржы маселелери чечилди.
