Финансы рыногун жөнгө салуу жана көзөмөлдөө кызматынын төрагасы Кайрат Маматов Кыргызстанда чет өлкөлүк онлайн-казинолорду, порносайттарды, жагымсыз тиркемелерди жана оюн платформаларын бөгөттөө үчүн интернет-трафикти көзөмөлгө алууну сунуштады. Бул тууралуу ал «Биринчи радионун» эфиринде билдирди.

Маматовдун айтымында, учурдагы тыюу салуулар натыйжа бербей жатат: жарандар VPN аркылуу кумар оюндарын ойноону улантып, ири суммадагы акчаларынан жана мүлкүнөн ажырап жатышат. Ошондой эле ал балдардын коопсуздугуна көңүл буруп, Roblox сыяктуу платформаларга чектөө киргизүү маселесин кароону сунуштады. Мындай чараларды киргизүүдө Түркия менен Кытайдын тажрыйбасын мисал келтирди.

Маматов чыпкалоо системасын киргизүү чоң чыгымдарды талап кыларын жана коомчулуктун нааразычылыгын жаратышы мүмкүн экенин моюнга алды. Ал бул жагдайды TikTok платформасынын бөгөттөлүшүнө карата болгон реакция менен салыштырып, мындай чаралар зарыл экенин билдирди.

Бул билдирүү тууралуу маалыматтар жарыялангандан кийин Финнадзор өз позициясын түшүндүрдү. Кызматтын маалыматына ылайык, сөз мыйзамсыз онлайн-казинолорду, букмекердик жана кумар оюндарын мыйзамсыз сунуштаган башка платформаларды даректүү бөгөттөө, ошондой эле аларга байланышкан төлөмдөргө бөгөт коюу жөнүндө болуп жатат. Мекеме социалдык тармактарга, мессенджерлерге жана жаңылык ресурстарына кирүүнү чектөө, жеке кат алышууларды көзөмөлдөө жана сөз эркиндигин чектөө каралбаганын баса белгиледи.

Финнадзор мындай чаралардын зарылдыгын кумар оюндарынын финансылык жана социалдык тобокелдиктери менен түшүндүрдү. Алардын катарына карызга батуу, топтолгон акчадан, автоунаадан жана турак жайдан ажыроо, үй-бүлөлөрдүн бузулушу кирет. Кызматтын ыкчам маалыматына ылайык, Кыргызстандагы колдонуучуларга багытталган көптөгөн чет өлкөлүк мыйзамсыз онлайн-казинолор жана букмекердик платформалар бар. Ири мыйзамсыз букмекердик платформалардын биринин гана ай сайын активдүү аудиториясы Кыргызстандагы 40 миңден ашуун колдонуучудан турат. Оюн эсептери негизинен эл аралык төлөм системаларынын банк карталары аркылуу толукталып, акча өлкөдөн сыртка чыгып кетүүдө.

Финнадзор баса белгилегендей, чаралар даректүү мүнөздө болуп, жарандардын укуктарын сактоо менен мыйзам чегинде колдонулушу керек.