Экономика жана коммерция министрлиги «Коом талкуу» порталына жайгаштырылган алкоголдук продукцияга акциздик ставкаларды өзгөртүү боюнча Министрлер кабинетинин токтом долбоорун кайтарып алды. Документ кайра иштеп чыгууга жөнөтүлдү.

Долбоордо Кыргыз Республикасынын Салык кодексинин 336 жана 345-беренелеринин талаптарын ишке ашыруу чаралары жөнүндө Министрлер кабинетинин 2022-жылдын 22-февралындагы №94 токтомуна өзгөртүүлөрдү киргизүү каралган. Министрликтин маалыматына ылайык, буга чейин жарыяланган долбоордун версиясы эми актуалдуу эмес. Ведомство жалпыга маалымдоо каражаттарынан бул жагдайды өз материалдарында эске алууну өтүндү.

Reporter.kg маалымкаты. Долбоор 4-ноябрда коомдук талкууга чыгарылган. Кайтарылып алынган нускада шарапка, газдалган шараптарга жана алкоголу аз ичимдиктерге бирдиктүү акциздик ставканы литрине 100 сом өлчөмүндө белгилөө сунушталган. Учурда шарапка акциз литрине 25 сомду, газдалган шараптарга жана шампанга 50 сомду, алкоголу аз ичимдиктерге 100 сомду түзөт. Ликер-арак азыктарына акциз 2029-жылга карата 2026-жылдагы деңгээлге салыштырмалуу 75%га жогоруламак. Министрлик ставкаларды жогорулатуунун эки максатын түшүндүргөн: бюджеттин кирешесин көбөйтүү жана салыктан качуу схемаларына каршы күрөшүү.

Учурда Министрлер кабинетинин 2025-жылдын 18-декабрындагы токтому күчүндө. Анда алкоголдук ичимдиктерге акциздик ставкаларды 2026-жылдын 1-январынан 2029-жылдын 1-январына чейин этап-этабы менен жогорулатуу каралган. 2026-жылдын 1-январынан тартып аракка акциз литрине 200 сомду түзөт.