Баткен облусунун Өрүкзар айылындагы «Өрүк-Зар» орто мектебинин 9-класстарынын окуучулары кабылган жол кырсыктан улам эки окуучу жандандыруу бөлүмүндө. Бул тууралуу Билим берүү жана илим министрлиги Кадамжай райондук билим берүү бөлүмү берген маалыматка таянып билдирди.
Маалыматка караганда, жол кырсыгы 1-июнда катталган. Кырсыкка кабылган «Hyundai Porter» автоунаасынын ичинде «Өрүк-Зар» орто мектебинин 9-а-б-класстын окуучулары жана класс жетекчилери болгон.
Окуучулар мектепте класс жетекчилери Г.Закирова жана А.Үрүстөм кызы менен биргеликте виньеткага сүрөткө түшүп, андан соң саат 18:30да Өрүк-Зар айылынын спорт аянтчасына барып сүрөткө түшөбүз деп, «Hyundai Porter» автоунаасына 25 окуучу чыккан. Автоунааны А.Үрүстөм кызы айдап бара жаткан. Жолдо автоунаанын борту (тосмосу) сынып кетип, окуучулар жерге кулап түшкөн.
Белгиленгендей, кырсыктан 9 окуучу Кадамжай райондук жалпы дарыгерлер практикалык борборуна жеткирилип, медициналык текшерүүдөн өткөрүлгөн. Жыйынтыгында 2 окуучу кыз жандандыруу бөлүмүнө жаткырылган. Учурда кыздардын абалы жакшы. Окуучу кыздар 6-июнда томографиялык текшерүүдөн өтүшөт.
Учурда жол кырсыгына кабылган окуучулардын окуясы боюнча тергөө иштери жүрүүдө. Тергөөнүн жыйынтыгына жараша мектеп администрациясына жана класс жетекчилерге тиешелүү чаралар көрүлөт.
Биздин Телеграм каналга катталыңыз
