Жалал-Абад облусунун Шамалды-Сай шаарынын тургундарын сапаттуу ичүүчү суу менен камсыз кылуу маселеси мамлекеттин өзгөчө көзөмөлүнө алынды. Жергиликтүү шаардык кеңештин депутаттары менен болгон жолугушуунун жыйынтыгында Министрлер Кабинетинин Төрагасынын орун басары — айыл чарба министри Эрлист Акунбеков «Таза Суу» департаментине тийиштүү тапшырма берди.

Ачык диалогдун жүрүшүндө тараптар шаардык инфратүзүмдүн комплекстүү көйгөйлөрүн талкуулашты. Суу менен камсыздоо жана саркынды сууларды чыгаруу тутумдарынан тышкары, делегаттар калктын жашоо сапатын жогорулатуу максатында жаңы көпүрө куруу, жолдорду оңдоо, бош турган (иштебеген) социалдык объекттерди пайдаланууга берүү жана Шамалды-Сайдын инженердик-коммуналдык тармактарын заманбапташтыруу зарылдыгы тууралуу маселелерди көтөрүштү.

Акунбеков жарандарды коопсуз ичүүчү суу менен камсыз кылуу мамлекеттик саясаттын негизги артыкчылыктуу багыты болуп саналарын баса белгиледи. Тармактык мекемелерге жергиликтүү өз алдынча башкаруу органдары менен биргеликте курулуш жана оңдоо иштерин баштоо үчүн долбоордук-сметалык документтерди даярдоону эң кыска мөөнөттө аяктоо жана каржылоо булактарын аныктоо тапшырылды.