Кыргызстандын президенти Садыр Жапаров тиешелүү мамлекеттик түзүмдөргө жана жергиликтүү өз алдынча башкаруу органдарына табигый кырсыктын кесепеттерин тез арада жоюуну тапшырды. Бул тууралуу мамлекет башчысынын басма сөз катчысы Аскат Алагозов билдирди.

Анын айтымында, президент 19–22-июнь күндөрү нөшөрлөп жааган жамгырдан улам Баткен облусунда жүргөн селдин кесепеттеринен кабардар.

Мамлекет башчысы ошондой эле жабыркаган тургундарга жардам көрсөтүүнү тапшырды.

«Учурда кырсыктан жабыркаган райондордо тиешелүү кызматтар күчөтүлгөн тартипте иштеп, кырдаалды турукташтыруу, жолдорду тазалоо жана жарандардын коопсуздугун камсыз кылуу боюнча чараларды көрүп жатышат», — деп билдирди басма сөз катчысы.

Алагозов табигый кырсыктын кесепеттерин жоюу жана калкка жардам көрсөтүү иштери президенттин жеке көзөмөлүндө экенин кошумчалады.