Иран менен АКШнын ортосундагы акыркы макулдашуу БУУнун Коопсуздук Кеңешинин резолюциясы менен бекитилет, – деп билдирет ирандык Mehr агенттиги Тегеран менен Вашингтондун ортосундагы өз ара түшүнүшүү жөнүндө меморандумдун долбооруна шилтеме берип.

Буга чейин Ирандын Тышкы иштер министринин орун басары Казем Гариб-Абади Иран менен АКШнын ортосундагы өз ара түшүнүшүү жөнүндө меморандумдун үстүнөн иштөө аяктаганын тастыктаган. Ага кол коюу жума күнү, 19-июнда Швейцарияда өтөт. Мындан тышкары, долбоорго ылайык, АКШ Ирандын ички иштерине кийлигишпөөгө жана Ислам Республикасынын эгемендүүлүгүн урматтоого милдеттенет.

Долбоордо ошондой эле тараптар меморандумга кол койгондон кийин 30 күндүн ичинде гана Ормуз кысыгы ачыла тургандыгы белгиленген.

Ошондой эле ЖМКлар макулдашуунун чоо-жайы жакынкы 24–48 сааттын ичинде ачыкталарын жазып жатышат.

Белгилей кетсек, Ирандын ядролук программасы боюнча таштаган кадамдарына жооп катары санкцияларды алып салуу боюнча Франция, Италия, Улуу Британия жана Германиянын биргелешкен билдирүүсүнө буга чейин 17 өлкө кошулду. Бул тууралуу Даунинг-стрит тарабынан жарыяланган тизме далилдеп турат.

Билдирүүдө өлкөлөр АКШ менен Ирандын ортосундагы өз ара түшүнүшүү жөнүндө меморандумду кубаттап, Ирандын ядролук куралга ээ болбошу үчүн АКШ, Иран жана МАГАТЭ менен кызматташууга даяр экендигин белгилешкен. Ирандын бул багыттагы ачык жана ишенимдүү кадамдарына жооп катары өлкөлөр ага карата санкцияларды алып салууга даяр.

Даунинг-стрит жарыялаган билдирүүгө кол койгон өлкөлөрдүн тизмесине ылайык, кийинчерээк Япония, Канада, Австралия, Бельгия, Болгария, Кипр, Доминикан Республикасы, Эстония, Финляндия, Греция, Латвия, Польша жана Португалия да санкцияларды алып салууга даяр экендиктерин билдиришкен.