Бүгүн, 6-августта, Казакстандын премьер-министри Олжас Бектенов Евразия өкмөттөр аралык кеңешинин жыйынына катышуу үчүн Кыргызстанга келди. Бул тууралуу Министрлер кабинетинин басма сөз кызматы билдирди.

Мейманды «Ысык-Көл» эл аралык аэропортунан Министрлер кабинетинин төрагасынын орун басары — суу ресурстары, айыл чарба жана кайра иштетүү өнөр жайы министри Эрлист Акунбеков тосуп алды.

Евразия өкмөттөр аралык кеңешинин кезектеги жыйыны 6-7-август күндөрү Чолпон-Ата шаарында өтөт. Ага ЕАЭБге мүчө мамлекеттердин өкмөт башчылары жана байкоочу өлкөлөрдүн делегация жетекчилери катышат.