Ушул жылдын октябрь айында Түштүк Кореяда иштөөнү каалаган жарандар үчүн EPS-TOPIK корей тили боюнча кошумча жалпы тестирлөө өтөт. Бул тууралуу Миграция министрлигине караштуу Жарандарды чет өлкөгө ишке орноштуруу борбору билдирди.

Тестирлөөгө онлайн каттоо 24-августтан 28-августка чейин www.migrant.kg расмий сайтында жүргүзүлөт. Каттоо үчүн маалыматтарды толтуруу жана документтерди электрондук форматта жүктөө зарыл. Тестирлөө өзү 14-октябрдан 17-октябрга чейин өткөрүлөт.

Тестирлөөгө катышуу шарттары:

• 1986-жылдын 25-августунан 2008-жылдын 24-августуна чейин туулган (18 жаштан 39 жашка чейинки) жарандар;
• соттуулугу жок жана кылмыш жоопкерчилигине тартылбаган адамдар;
• Түштүк Кореядан депортацияланбаган же өлкөдөн чыгуу боюнча буйругу жок жарандар;
• Кыргыз Республикасынан чыгууга чектөөсү жоктор;
• корей тилин базалык деңгээлде билгендер.

Тестирлөөгө катышууга төмөнкүдөй чектөөлөр бар:

• түстөрдү ажырата албаган (дальтонизм) жарандарга;
• Кореяда E-9 же E-10 визаларынын негизинде 5 жыл жана андан ашык мөөнөттө жүргөн адамдарга;
• өлкөдөн чыгууга тыюу салынган адамдарга катышууга уруксат берилбейт.