Кыргызстандын Министрлер кабинетинин төрагасы Адылбек Касымалиев ички иштер органдарынын кызматкерлерин жана ардагерлерин кесиптик майрамы — Милиция күнү менен куттуктады. Ал өз кайрылуусунда кылмыштуулукка каршы күрөштүн жыйынтыктары, ИИМди модернизациялоо жана кызматкерлерди социалдык жактан колдоо чаралары тууралуу айтып берди.

Минкаб башчысынын айтымында, мамлекеттин негизги милдети — коомдун коопсуздугун камсыздаган, жарандардын укуктарын коргогон жана алардын ишенимине ээ болгон заманбап укук коргоо системасын калыптандыруу.

Ал дүйнөдө туруксуздук күчөп турган шартта милиция кызматкерлеринин алдында кесиптик даярдыкты, ыкчамдыкты жана заманбап технологияларды өздөштүрүүнү талап кылган татаал милдеттер турганын белгиледи.

Касымалиев акыркы жылдары Кыргызстанда уюшкан кылмыштуулукка жана коррупцияга каршы күрөш күчөгөнүн билдирди. Анын айтымында, буга саясий пикир келишпестиктердин азайышы жана кылмыштуулукка каршы турууда мамлекеттик органдардын биргелешкен аракеттери да өбөлгө түздү.

Минкаб башчысы укук бузуулардын санынын кыскаргандыгы тууралуу маалыматтарды да келтирди. Анын айтымында, катталган кылмыштардын саны 78%га, ал эми одоно укук бузуулардын саны 69%га азайган.

Касымалиев ички иштер органдарынын материалдык-техникалык базасын чыңдоого өзгөчө көңүл бурду. Анын сөзү боюнча, өлкөдөгү экономикалык өсүштүн аркасында техникаларды сатып алууга, кызматтык имараттарды курууга жана милиция кызматкерлеринин иш шарттарын жакшыртууга кошумча каражаттар пайда болду.

Акыркы төрт жылда Кыргызстандын ИИМинин автопаркы 95%га жаңыртылды. Мындан тышкары, мекеме заманбап талаптарга жооп берген атайын унаалар менен камсыздалды.

Ушул эле аралыкта ар кандай багыттагы 200дөн ашык объект курулуп, пайдаланууга берилди.

ИИМ системасында калкты тейлөөгө багытталган милициянын көчмө кабылдамалары жана санариптик эксперттик борборлор иштей баштады. Ал эми коомдук коопсуздукту жогорулатуу максатында өлкө боюнча 10 миңден ашык видеокөзөмөл камералары орнотулду.

Касымалиев акыркы жылдары милиция кызматкерлеринин эмгек акысы эки эсеге көбөйгөнүн маалымдады. Ал эми Баткен облусунун алыскы райондорунда кызмат өтөгөн милиционерлердин айлыгы төрт эсеге өскөн.

Кызматкерлерди турак жай менен камсыздоо социалдык колдоонун маанилүү багыттарынын бири болду.

Минкаб башчысынын айтымында, 2021-жылдан 2026-жылга чейин ички иштер органдарынын 724 кызматкери батирлүү болду. Ал ИИМдин материалдык-техникалык базасын бекемдөө жана кызматкерлердин социалдык шарттарын жакшыртуу мамлекеттик саясаттын артыкчылыктуу багыты бойдон кала берерин баса белгиледи.

Өз кайрылуусунда Касымалиев милициянын ардагерлерине өзгөчө ыраазычылык билдирип, алардын кесиптик салттарды сактоого жана жаш кызматкерлерди тарбиялоого кошкон салымын белгиледи. Анын айтымында, улуу муундун тажрыйбасы кадрларды даярдоодо жана кызматка жоопкерчиликтүү мамилени калыптандырууда чоң мааниге ээ.

Минкаб төрагасы алдыда өлкөнү чоң өзгөрүүлөр күтүп жатканын, ал эми алардын ийгиликтүү ишке ашышы көбүнесе коомдук коопсуздуктан, мыйзамдардын сакталышынан жана жарандардын укуктарынын корголушунан көз каранды экенин белгиледи.

«Эгер өлкөбүздө тартип орноп, ар бир жарандын укугу сакталса, ынтымак жана биримдик болсо, бардык кыйынчылыктарды жеңебиз», — деп айтылат куттуктоодо.

Сөзүнүн аягында Касымалиев ички иштер органдарынын кызматкерлерине жана ардагерлерине чың ден соолук, үй-бүлөлүк бакыт жана кызматында ийгиликтерди каалады.