Кыргызстанда автомобиль транспорту негизги транспорт түрү бойдон калууда. 2025-жылы автоунаалар менен 62 миллион тоннадан ашык жүк ташылган. Бул жалпы жүк ташуунун 80%дан ашыгын түзөт. Ал эми жүргүнчүлөрдү ташууда автомобиль транспортуна 90%дан ашык үлүш туура келет. Бул тууралуу Улуттук статистика комитети Автомобиль жана жол чарба кызматкерлеринин күнүнө карата билдирди.

Жүк ташуунун жарымынан көбүн, тактап айтканда 56%дан ашыгын жеке ишкерлер аткарышкан. Жүктөрдүн эң көп көлөмүн Бишкек шаарынын, Талас жана Чүй облустарынын ишканалары ташыган.

Автомобиль транспорту менен ташылган жүргүнчүлөрдүн ичинен 381 миллиону же 58%ы жеке адамдарга таандык автобустар жана таксилер менен жүргөн. Адистештирилген автотранспорт ишканалары 279 миллион жүргүнчүнү же жалпы көлөмдүн 42%га жакынын ташыган. Адистештирилген автобустар жана электробустар менен жүргүнчүлөрдү ташуунун көлөмү бир жылда 1,6 эсеге өскөн. Жүргүнчүлөрдүн эң көп санын Бишкек жана Чүй облусундагы чарба жүргүзүүчү субъекттер ташыган.

2026-жылдын 1-январына карата Кыргызстандын тургундарынын жеке менчигинде 1,4 миллион жеңил унаа болгон. Бул 2025-жылдын башындагы көрсөткүчтөн 13%га көп. Туруктуу калктын ар бир 1 000 адамына 191 жеңил унаадан туура келет. Унаалардын саны Чүй облусунда (1 000 адамга 288 унаа) жана Бишкек шаарында (260 унаа) эң көп.

Улуттук статистика комитети автомобиль транспорту 1930-жылдардын башында өнүгө баштаганын эске салды. Өлкөнүн бийик тоолуу рельефине жана көптөгөн аймактарга жетүүнүн кыйынчылыгына байланыштуу автомобиль транспорту башынан эле башка транспорт түрлөрүнүн арасында алдыңкы орунду ээлеп келген.