Азамат Эсенбеков Кыргызстандын президенттигине талапкер болууну көздөгөн дагы бир жаран болду. Ал Шайлоо жана референдум өткөрүү боюнча борбордук комиссияга өзүн-өзү көрсөтүү тартибинде талапкерлигин көрсөтүү тууралуу арыз менен кайрылды.

Буга чейин БШК президенттик шайлоого катышуу ниетин билдирген Аймен Касеновдун документтерин кабыл алган.

Эсенбеков 1984-жылдын 4-июнунда туулган. 2005-жылы Жусуп Баласагын атындагы Кыргыз улуттук университетин «Финансы жана кредит» адистиги боюнча аяктаган. 2014-жылы Москвадагы Орусиянын Тышкы иштер министрлигинин Дипломатиялык академиясын «Дүйнөлүк экономика» багыты боюнча бүтүргөн. Экономика илимдеринин кандидаты.

Президенттик шайлоого талапкерлерди көрсөтүү мөөнөтү 2026-жылдын 13-ноябрына чейин уланат. Шайлоо 2027-жылдын 27-январында өтөт.