Кыргызстанда учурда 11 рестпоинт иштеп жатат. Бул тууралуу Жогорку Кеңештин жыйынында Инвестициялар жана өнүктүрүү боюнча улуттук агенттиктин директорунун биринчи орун басары Эрденет Касымов билдирди.

Анын айтымында, өлкө боюнча жалпысынан 18 мындай объект курулган. Алардын ичинен 11и ишке берилген жана иштеп жатат, калгандары боюнча ишкерлер менен ижара келишимдерин түзүү иштери жүрүүдө.

Депутат Махабат Мавлянова рестпоинттерди ишкерлерге акысыз берүү сунушун киргизип, аларды тийиштүү деңгээлде кармоону камсыз кылуу керектигин белгиледи.

«Аксыда, Кербенден чыккан жерде айнектери сынган рестпоинт турат. Ал жерде таш менен терезелерди талкалап салышкан. Рестпоинттерди куруунун максаты акча табуу эмес, өлкөнүн туристтик жагымдуулугун жогорулатуу болчу», — деди депутат.

Эскерте кетсек, туристтик рестпоинттерди куруу долбоору Кыргызстан Республикасынын Маданият, маалымат, спорт жана жаштар саясаты министрлигине караштуу Туризмди өнүктүрүүнү колдоо фонду тарабынан өлкөнүн туристтик инфраструктурасын өнүктүрүү программасынын алкагында демилгеленген.

Долбоордун максаты негизги туристтик маршруттардын жээгинде жол боюндагы сервис объекттеринин тармагын түзүү болгон. Рестпоинттер саякатчылар үчүн негизги шарттарды — санитардык түйүндөрдү, эс алуу жайларын жана маалыматтык пункттарды камсыз кылышы керек эле. Бул долбоор Кыргызстандын туристтик жагымдуулугун жогорулатуу жана эл аралык туристтик рейтингдердеги ордун жакшыртуу максатында ишке ашырылып жаткан демилге катары көрсөтүлгөн.

Долбоордун алкагында өлкө боюнча жалпысынан 21ге жакын рестпоинт куруу пландалган.

2023-жылдын май айында Улуттук коопсуздук мамлекеттик комитети долбоорду ишке ашырууда мыйзам бузуулар аныкталганын билдирген. Тергөө версиясына ылайык, рестпоинттерди курууда бюджеттик каражаттарды максатсыз пайдалануу жана мүмкүн болгон ысырап кылуу фактылары катталган.

2023-жылдын 18-майында Туризмди өнүктүрүүнү колдоо фондунун жетекчиси Елена Калашникова кармалган. Кылмыш иши 2023-жылдын апрель айында козголгон.

Тергөө органдарынын маалыматына ылайык, долбоорду ишке ашыруу үчүн каражаттар подрядчыларга толук которулган, бирок объекттердин бир бөлүгү бүткөрүлбөй калган же белгиленген тартипте ишке берилген эмес.

Иш козголгон учурда жана андан кийинки текшерүүлөрдө пландалган объекттердин бир бөлүгү гана ишке берилгени, ал эми олуттуу бөлүгү бүтпөй же пайдаланылбай турган абалда экени айтылган.

Кийин келтирилген зыяндын бир бөлүгү орду толтурулуп, анын негизинде сот Калашниковага карата баш коргоо чарасын үй камагына өзгөрткөн.