2025-жылы Кыргызстанда 33,4 миң адам каза болгон. Бул 2021-жылга салыштырмалуу 5,5 миң адамга же 14,0%га аз. 2021-жылы 38,9 миң адам каза болгон. Өлүмдүн жалпы көрсөткүчү 1000 адамга 4,6 учурга чейин төмөндөп, 2021-жылы 5,7 учурду түзгөн. Бул тууралуу Улуттук статистика комитети «Кыргыз Республикасынын демографиялык жылдыгында: 2021–2025» маалымдады.

Өлкөдө жалпы өлүмдүн көрсөткүчүнө эң көп таасир эткен себеп — кан айлануу системасынын оорулары. 2025-жылы бул оорулардан 17,8 миң адам же каза болгондордун жалпы санынын 53,2%ы көз жумган. Жүрөк-кан тамыр ооруларынан каза болгондордун 80%ы эмгекке жарамдуу курактан өткөн адамдар. Ошол эле учурда бул оорулар эмгекке жарамдуу калктын арасында да өлүмдүн негизги себептеринин бири бойдон калууда — бул топтогу өлүмдөрдүн 35%га жакынын түзөт.

Маанилүүлүгү боюнча экинчи орунда онкологиялык оорулар турат. 2025-жылы алар каза болгондордун жалпы санынын 13,6%ын түзгөн. Андан кийинки орунда өлүмдүн табигый эмес себептери — жаракаттар жана уулануулар турат. Алар жалпы өлүмдүн 6,6%ын түзүп, мындай учурлардын 76%ы эмгекке жарамдуу курактагы адамдарга туура келет. Дем алуу органдарынын оорулары өлүмдөрдүн 6,2%ына себеп болгон.

Энелердин өлүмүнүн көрсөткүчү да жогору бойдон калууда. 2025-жылы кош бойлуулук, төрөт жана төрөттөн кийинки мезгилдеги татаалдашуулардан 31 аял каза болгон. Энелердин өлүмүнүн көрсөткүчү 100 миң тирүү төрөлгөн балага 22,1 учурду түзгөн.

Акыркы жылдары ымыркайлардын өлүмү кыйла азайганына карабастан, көрсөткүч жогору бойдон калууда. 2025-жылы бир жашка чейинки 1,6 миң ымыркай каза болгон. Бул 1000 тирүү төрөлгөн балага 11,6 өлүмгө туура келет. Негизги себеп — перинаталдык мезгилдеги оорулар жана абалдар (65,2%). Андан кийин тубаса кемтиктер (15,8%) жана дем алуу органдарынын оорулары (9,5%) турат.

Өлүмдүн өсүшүнүн басаңдашы төрөлгөндө күтүлүүчү өмүр узактыгынын көбөйүшүнө өбөлгө түздү. Эркектерде бул көрсөткүч 68,7 жашты, аялдарда 76,9 жашты түздү. Аялдардын пенсия курагына чейин жашап жетүү мүмкүнчүлүгү 90%дан жогору болсо, эркектерде 80%га жакын.